Tuesday, October 20, 2009

الله لا يجيب النكد


اذا في يوم من الأيام صحيت من النوم بكير على تلفون من صاحب قديم كنت تعرفه من سنين، وتذكرك اليوم عشان يطلب منك تكفله في البنك عشان ياخذ قرض...
فإنت أكيد مش رح تتنكد!


وإذا كنت متجوز بدر البدور ومرتك أحلى منها ما بتلاقي لو مهما تلف وتدور، بس كل ما تصحى من النوم بتلاقي بوزها ممدود 3 شبور...
فإنت أكيد مش رح تتنكد!


وإذا يوم كنت رايح على شغلك ورايق وأمورك كلها تمام ولابس حزام الأمان، بس شرطي ابن... حلال وقفك وخالفك عشان الكوشوك تعبان...
فإنت أكيد مش رح تتنكد!


وإذا كنت رايح على جامعتك وانت لابس أحلى اشي بخزانتك ومتعطر بأغلى عطر عندك، وركبت في الباص على الواقف وحواليك 72 عامل وافد ريحتهم طالعة وتمسحو فيك وانت طالع وحبو يدعسو عليك وانت نازل...
فإنت أكيد مش رح تتنكد!


وإذا صحيت من النوم ولقيت أمك عم تجوح وتنوح ونازلة لطم على الخدود ولقيتها عاملة كل الدراما هاي عشان أخت ابن عم بنت خالة خال أبوها في الرضاعة اللي عمرها ما شافتها أصلاً توفت بالسرطان...
فإنت أكيد مش رح تتنكد!


وإذا في يوم من الأيام ابتسمتلك الحياة وتعرفت على بنت أمورة ومحترمة من فيس بوك، ولما استقرت الأمور وطلعت تشوفها بكوفي شوب في عمان وتكتشف انه نص شباب عمان زملاءها ومثل اخوانها وجيران...
فإنت أكيد مش رح تتنكد!


وإذا صحيت في يوم وما لقيت اسهم البورصة نازلة بس لاقيت الأسعار كلها مرتفعة وشامطة في السما...
فإنت أكيد مش رح تتنكد!


وإذا صحيت في يوم متأخر شوي ولقيت الحمام ومشغول، وبعديها كانت الطريق مسكرة عشان المواطنين حابين يتفرجوا على حادث، وانخصم عليك يوم كامل لأنك تأخرت عن شغلك ساعة...
فإنت أكيد مش رح تتنكد!


وإذا صحيت في يوم وما لقيت اشي يعملك نكد في البيت، وطريقك للشغل كانت ميسرة، وزملاءك بالشغل كانوا عاقلين وما طرقوك ولا اسفين، وانت ضليت عاقل ورصين وكل ما يطلب منك اشي صاحب الشغل تحكي حاضر وآمين، بس في ساعة تذكرت المآسي والكوارث اللي صارت معاك والأسافين اللي أكلتها قبل بيوم...
فإنت أكيد أكيد أكيد... مش رح تتنكد!