Saturday, September 13, 2008

مصائب قوم عند قوم فوائد


قد يبدو العنوان مألوفاً لدى الكثيرين منا... بس شو هالمصيبة اللي عم نحكي عنها؟! أنا برأيي مافي داعي نعطي الموضوع أكبر من حجمه لأنه القصة مو مستاهلة وصارت روتين يمارس في الصيف على باب كل مقهى ومول. "للعائلات فقط" كلمة بستقبلك فيها حارس الأمن على الباب قبل ما تسمي بالله ولا تحكي حرف بخليك تحس انك انت جاي تشحد جوات المول!



ما حدا بقدر ينكر انه قرار المنع اللي صار نافذ على أبواب المولات منذ أكثر من سنة فتح مجال جديد في سوق العمل للجنس الخبيث... قصدي الجنس اللطيف! بحيث أنه أصبح بإمكان الشاب الراغب في دخول المول استئجار فتاة من العاطلات (قصدي العاطلات عن العمل!) بمبلغ دينار واحد فقط لا غير وتدخل معه البنت على أساس انها (أخته) الله يخليله خواته، أو بتدخل معه على أساس انها الجيرل فريند (Girl Friend) تبعته والمشكلة انه الشب بكون ما بعرف شو يعني خبز بالانجليزي!



أنا هون بحب أسأل كم سؤال للناس العباقرة أصحاب فكرة (للعلائلات فقط)...

أولاً: ليش البنات ما حدا بمنعها من دخول المولات لحالها؟! هل بسبب خلفيتها الثقافية أو المقدمات اللي بتكون دايماً سابقتها وبتفتل راس حراس الأمن على الأبواب

!ثانياُ: أنا كشاب بالغ عاقل راشد ومتخرج وبشتغل كمان، شو سبب منعي من دخول جنات الخلد (قصدي المولات)؟ هل من المعقول اني بدي أمارس مراهقتي في المول وأنا عمري 23 سنة!!!



على العموم بكرا بخلص الصيف وبرجع فصل الشتا وبنشوفكم حفيانين ليدخل عليكم زبون سواء كان شب، بنت أو حتى (...) ...!